کونسوڵی ئێران لەبارەی لابردنی ڤیزایی نێوان عێراق و ئێران ڕوونکردنەوەیدا
لڤین:
کونسوڵی گشتیی کۆماری ئیسلامیی ئێران لە هەولێر، ڕاگەیاند، بۆ جێبەجێکردنی نەمانی ڤیزا لەنێوان وڵاتەکەی و عێراق چاوەڕوانی عێراقن، هاوکات دەربارەی پەیوەندییەکانی هەرێمی کوردستان و ئێران بەتایبەت لەڕووی بازرگانیەوە چەند زانیارییەکی خستەڕوو.
نەسروڵڵا رەشنوودی، دەربارەی هەڵگرتنی ڤیزای نێوان عێراق و هەرێمی کوردستان لەگەڵ ئێران بۆ ئاژانسی ئەنادۆڵ قسەیکردووە و ڕایگەیاند، “پێشتر کۆماری ئیسلامیی ئێران و حکومەتی عێراق رێککەوتبوون لەسەر لابردنی ڤیزا لەنێوان ھەردوو وڵاتدا، بەڵام بەھۆی ھاتنی کورۆناوە ئەو بڕیارە نەما، چونکە خۆی بۆ ئەوکاتە بڕیارەکە کاتی بوو و گەڕاینەوە سەر ھەمان بڕیاری پێشوو کە بۆ هاتووچۆی نێوان هەردوو وڵات ڤیزا هەبێت، بەڵام لە دوایین کۆبوونەوەکاندا لە ئێران بڕیاری لەسەر دراوە کە ڤیزا ھەڵبگیرێت و کۆماری ئیسلامیی ئێران ڕەزامەندی دەربڕیوە لەسەر لابردنی ڤیزا و ئێستا چاوەڕوانی وەڵامی عێراق دەکەین تا ببێتە بڕیار و ڤیزا لەنێوان هەردوو وڵاتدا نەمێنێت، چاوەڕوان دەکەین بەم زووانە ببێتە بڕیار و عێراقیش رەزامەندی دەربڕێت”.
دەربارەی قەبارەی بازرگانی نێوان هەرێمی کوردستان و ئێران، کونسوڵی گشتیی ئێران لە هەولێر وتی: هەبوونی مەرزە ھاوبەشەکان لەنێوانماندا، لەیەک نزیکی خەڵکی ھەرێمی کوردستان لەگەڵ ئێمەدا، نزمی نرخی کاڵاکانی ئێران و بەرزی کوالێتیەکانیان، بە خۆشحاڵییەوە قەبارەی بازرگانیمان رۆژ بە رۆژ لە زیاد بووندایە هەربۆیە وەک خۆتان دەبینن کە ساڵانە چەندین پێشانگای کاڵای ئێرانی لە هەرێمی کوردستان دەکرێتەوە”.
