لە سلێمانی سکچوون و ڕشانەوە زیادیانکردووە و هۆشداری لە کۆلێراش دەدرێت
لڤین:
بەڕێوەبەری تەندروستی سلێمانی ئاشکرایکرد، ژمارەی توشبوون بە سکچوون و ڕشانەوە سێ هێندە زیادیکردووە و ئەگەر کۆنتڕۆڵ نەکرێت کۆلێرا بڵاودەبێتەوە.
د. سەباح هەورامی بەڕێوەبەری گشتی تەندروستی سلێمانی لە کۆنگرەیەکی رۆژنامەوانیدا رایگەیاند، حاڵەتەکانی توشبوون بە سکچوون و ڕشانەوە بەراورد بە ڕابردوو سێ هێندە زیادیکردووە بۆیە ئەگەر کۆنتڕۆڵ نەکرێت مەترسی بڵاوبونەوەی نەخۆشی کۆلێرای لێدەکرێت.
وتیشی: زۆرترین حاڵەتەکانی توشبوون بە سکچوون و ڕشانەوە لە ناوچەکانی دەرەوەی سەنتەری پارێزگای سلێمانی تۆمارکراون، ئەوەشی وت کە “داوامان لە رێکخراوە تەندروستی و جیهانییەکان کردووە هاوکارمان لە پاراستنی هاوڵاتیان”.
ڕوونیشیکردەوە کە “یەکێک لە هۆکارەکان پەیوەندی بە وشکەساڵی و پەنابردنی خەڵک هەیە بۆ خورادنەوەی ئاوی بیر و ئەوەی نەشیاوە بۆ خواردن”.
بەڕێوەبەری گشتی تەندروستی سلێمانی داواشی لە هاوڵاتیان کرد خۆیان بەدور بگرن لە بەکارهێنانی ئاوی نەشیاو بۆ خواردنەوە، بەتایبەتی ئاوی بیر و سەرچاوە سروشتییەکان.
ئەوەشی وت کە لەچەند رۆژی داهاتوودا ڕێژەی کلۆر بۆ ئاوی خواردنەوەی هاوڵاتییان بەرزدەکەنەوە، کە رێژەیەکی ڕێگەپێدراوە.
