کەنەکە داوایەک ئاڕاستەی هەموو هێز و كەسایەتییە كوردستانییەكان دەکات

لڤین:

كۆنسەی بەڕێوەبەریی كۆنگرەی نەتەوەیی كوردستان (كەنەكە) لە ڕاگەیەنراوێكدا ڕایگەیاند،” زیاتر لە ٤٠ ڕۆژە لەشاخی مەتینا و ناوچەكانی دەوروبەری، شەڕێكی سەخت لەنێوان سوپای توركیا و گەریلاكانی هەپەگەدا بەردەوامە، ئامانجی دەوڵەتی توركیا و ئەنجامەكانی ئەو شەڕە ئاشكران، سوپای توركیا، خەڵكی ناوچەكەو دێ و دێهات و ژینگەی ناوچەكەشی كردووەتە ئامانجی شەڕەكەی خۆی و لەهەوڵی ئەوەدایە هەموو ناوچەكە داگیر بكات، هەتا ئێستا ٢٢ گوندی كورد و كلدانیان چۆڵكراون و زەوی و باخەكانی خەڵك و دارستانی ناوچەكە سوتێنراون. زیاتر لە ١٥٠٠ كەسی خەڵكی ئەو گوندانە ئاوارە بوون”.

هەروەها ئاماژەی بەوەشداوە،” ئەركی هەرە گرنگ و بەپەلە ئەوەیە ڕێگەنەدرێت كێشەكە گەورەتر بكرێت و ببێتە هۆكاری شەڕێكی ناوخۆیی، گەلی كوردستان و دۆستانی كورد بە هەستیارییەوە لە دۆخەكە دەڕوانن، پێویستە بە هەموو شێوازێك هەوڵ بدەین گرژییەكان گەورەتر نەبن، فراوانبوونی ڕووداوەكە دڵی خەڵكی كوردستان و دۆستانی دۆزەكەی دەسووتێنێت و دڵی نەیارانی خۆش دەكات و پێویستە هەموو كێشە و ئاڵۆزییەكانی نێوان هێزە كوردستانییەكان لە ڕێگای دیالۆگەوە چارەسەربكرێن. بۆ ئەو مەبەستەش، نزیكەی ساڵێكە ئێمە لە هەوڵی ئاشتی و دیالۆگی ناوخۆییداین. كۆنگرەی نەتەوەیی كوردستان و یەكێتی پەرلەمانتارانی كوردستان و كۆمەڵێك كەسایەتیی كوردستانیی، كۆمیتەیەكی دیالۆگی ناوخۆییان پێكهێنا و كەوتنە هەوڵدان و هەتا ئێستاش بەردەوامن”.

لە کۆتایی ڕاگەیەندراوەکەدا ئەوەشخراوەتەڕوو،” ئێمە وەك كۆنگرەی نەتەوەیی كوردستان داوا لە هەردوو لایەن دەكەین كە كێشەكە بە ڕێگای دیالۆگ چارەسەر بكەن. هەروەها داوا لە هەموو هێز و كەسایەتییە كوردستانییەكان دەكەین لەو بوارەدا بە هەڵوێست بن و ڕۆڵێكی ئەرێنی ببینن”.

بابەتی پەیوەندیدار

Back to top button