وەزارەتی پێشمەرگە:

تۆڵەی ئەو پێشمەرگە شەهیدانەمان کردەوە کە لەم ماوەدا بە هۆی هێرشی داعشەوە شەهید بوون

لڤین:

وەزارەتی پێشمەرگە، شەوی سێشه‌ممه‌ بە پشتیوانی هێزە تایبەتەكانی هاوپەیمانان لە ئاسمان و زەویەوە، هێزەكانیان هێرشیان كردە سەر چەكدارانی داعش و لەچەند ناوچەیەك پاكیان كردنەوە.

لە ڕاگەیەندراوێکدا، وەزارەتی پێشمەرگەی حكومەتی هەرێمی كوردستان،رایگەیاندووە، “لە تۆڵەی ئەو هێرش و پەلامارە تیرۆریستیانەی كە لەو ماوەیەدا داعش كردیە سەر سەنگەرەكانی پێشمەرگە و بووە هۆی شەهیدكردن و برینداركردنی چەند پێشمەرگەیەك، لەوانە (نەقیب پشتیوان قرنی، هێمن یەحیا، ئیدریس بەهرام و موحسینی حاجی حسین)، شەوی سێشه‌ممه‌ لە ئۆپەراسیۆنێكی تایبەتدا، هێزەكانی پێشمەرگە، بە پشتیوانی هێزە تایبەتەكانی هاوپەیمانان لە ئاسمان و زەویەوە، لە ناوچەی (كاوێركەوا – داوێ)، هێرشیان كردە سەر تیرۆریستانی داعش و ناوچەیەكی فراوانیان لێ پاككردنەوە”.

وەزارەتی پێشمەرگە ئاشکرایشی کردووە، “لە ئەنجامی ئەو هێرشەدا ژمارەیەك تیرۆریستی داعش كوژران، هەروەها چەند مۆڵگەیەكیان وێران كرا، كە تیایدا دەمانەوە و پیلانی كردەوە تیرۆریستیەكانیان تێدا دادەڕشت، چەند پارچە چەكیش كەوتنە دەست پێشمەرگە”.

له‌ كۆتای ڕاگەیەندراوەکەدا هاتووە،”ئەمە پەیامێك بوو بۆ تیرۆریستانی داعش، كە پێشمەرگە قارەمانەكانی كوردستان، هەموو كات ئامادە و دەست لەسەر تفەنگن بۆ بەرگری كردن لە نیشتیمانی كوردستان”.

بابەتی پەیوەندیدار

Back to top button