حکومەتی هەرێم سەرقاڵی ئامادەكردنی دیدگایەتی تا ساڵی ٢٠٣٠

لڤین:

بریكاری وەزارەتی پلاندانانی حكومەتی هەرێمی كوردستان، لە ساڵی رابردوەوە وەزارەتەكەیان بە هەماهەنگی لەگەڵ وەزارەتە پەیوەندیدارەكان سەرقاڵی ئامادەكردنی دیدگای ( ٢٠٣٠ )ـی هەرێمی كوردستانەو لە ئێستاشدا رەشنوسی دیدگاكەیان ئامادەكردوە.

زاگرۆس فەتاح، بریكاری وەزارەتی پلاندانان،ئەمڕۆ ( یەک شەممە،٣٠ی ئایاری ٢٠٢١ ) لە راگەیەندراوێكدا، ئاماژەی بەوەداوە کە،” بە چاودێری وەزیری پلاندانان، ئەمڕۆ یەكشەممە وەک لیژنەی باڵای دیدگای ( ٢٠٣٠ ) لە وەزارەتی پلاندانان کۆبوینەوە، کۆبوونەوەکە بە ئامادەبونی هەریەک لە بریکاری وەزارەتەکانی ( بازرگانی و پیشەسازی، تەندروستی و پەروەردە ) و بەڕێوەبەری گشتی پلانی ستراتیژی وەزارەتمان بە ڕێوەچوو”.

ئەوەشی خستۆتەڕو،” لە ساڵی پارەوە وەزارەتی پلاندانان بە هەماهەنگی لەگەڵ وەزارەتە پەیوەندیدارەکان لە ڕێگەی دو لیژنەوە (لیژنەی جێبەجیکارو لیژنەی باڵا) سەرقاڵی ئامادەکردنی دیدگای ( ٢٠٣٠ ) ی هەرێمی کوردستانە، لە ئێستادا ڕەشنوسی دیدگای ( ٢٠٣٠ ) مان ئامادەکردوەو لە لایەن لیژنەی باڵاوە دیراسە دەکرێت تا پێشنیار و تێبینیەکانی تێدا جێبکرێتەوە”.

وتوشیەتی”ئەم ڕەشنوسە جگە لە لایەنی حکومی، هاوکات رێکخراوە ناحکومیەکانی هەرێمی کوردستان ڕۆڵیان هەبوەو ڕاو سەرنجی ئەوانیشی تێدا جێکراوەتەوە، هەر لەم چوارچێوەیەدا ڕۆژی ( ٢ / ٦ / ٢٠٢١ ) ۆرکشۆپێک سازدەکرێت بۆ دەوڵەمەندکردنی ڕەشنوسەکە، کە تێیدا زانکۆکان و کۆمەڵێک ڕێکخراو و ئاژانسی تر بەشدار دەبن”.

لە بەشێکی تری ڕاگەیەندراوەکەدا هاتوە،” ئەم دیدگایە گشتگیر دەبێت و پلان و ئامانجەکانی حکومەت بۆ دە ساڵی داهاتو لەسێکتەرە جیاوازەکاندا لە خۆدەگرێت و نەخشەڕێگای گەیشتن بە ئامانجە ستراتیجییەکان ڕون دەکاتەوە”.

لە کۆتایدا هاتووە،”هەبونی دیدگایەکی رونی لەم شێوەیە یارمەتیدەر دەبێت بۆ سەرنجڕاکێشانی ڕێکخراوە نێودەوڵەتییەکان و وەبەرهێنەرانی بیانی بە ئاڕاستەی کارکردنی زیاتر لەگەڵ حکومەتی هەرێمی کوردستاندا”.

 

بابەتی پەیوەندیدار

Back to top button