لەشاری سلێمانی ده‌ست به‌سه‌ر بڕێك ده‌رمانی نایاساییدا ده‌گیرێت

لڤین:

لەشكر حەمید، سەرۆكی لیژنە هاوبەشەكانی قائیمقامیەتی سلێمانی، ئەمڕۆ ( دووشەممە، ٢٤ی ئایاری ٢٠٢١ ) لە لێدوانێکیدا بۆ میدیاکان رایگەیاند،” ئێمە وەك لیژنە هاوبەشەكانی قائیمقامیەتی سلێمانی، بەوردی چاودێری هەمو ئەو شوێنانە دەكەین كە دەرمان و پێداویستی پزیشكی تێدا دەفرۆشرێت.”

ڕایشیگەیاند،” لە دوكان و شوێنە گشتییەكاندا ئەو بابەتەمان بەڕادەیەكی زۆر باش كۆنترۆڵ كردوە. هەمو ئەو پەیجانە لە رێگەی تۆڕە كۆمەڵایەتییەكانەوە بەشێوازی ئۆنلاین لە پارێزگای سلێمانی كاری فرۆشتنیان كردوە، دەتوانم بڵێم بەشێكی زۆریان كۆنترۆڵ كراون زۆر بەكەمی ئێستا دەتوانرێت لە پارێزگای سلێمانی، دەرمان بە شێوازی ئۆنلاین بفرۆشرێت.”

لە درێژەی لێدوانەکەیدا ئاماژەی بەوەدا،” بەداخەوە بەشێك لە پەیجەكان كە لە دەرەوەی پارێزگای سلێمانی و لە پارێزگاكانی دیكەوە لەوانە لە هەولێرەوە بەشێوازی ئۆنلاین ئەو دەرمانانە دەفرۆشن، دوای ئەوەی ئێمە داوای دەرمانیان لێدەكەین بەشێوەی دیلیڤەری بۆمان دەهێنن.”

ئاماژەی بەوەیشدا،”ئەمڕۆ بڕێكی زۆر مەوادمان داواكرد لەڕێگەی یەكێك لەو پەیجانەی لە پارێزگای هەولێرن، كە مەوادەكانی پێچەوانەی رێنمایی تەندروستین، ستیكەری كوالێتی كۆنترۆڵی پێوە نییەو پكشنینی بۆ نەكراوە بۆیە دەستمان گرت بەسەر موادەكاندا كە لە رێگەی پەیجێكی ئۆنلاینەوە دەفرۆشرێت و ئیجرائاتی یاسایی لەگەڵ خاوەنەكەی دەكەین.”

جەختیشی كردەوە “دڵنیایی دەدەینە هاوڵاتیان كە ئێمە رێگەنادەین بەو دەرمانانەی لە دەرەوەی پارێزگای سلێمانی بەشێوازی نایاسایی دێنە پارێزگای سلێمانی چاودێری وردییان دەكەین لەگەڵ چاودێری وردی پەیجە ئۆنلاینەكان، هەر پەیجێك دەرمان بەشێوەی دیلیڤەری بنێرێت بۆ پارێزگای سلێمانی ئیجرائاتی یاسایی لەگەڵ دەكەین.”

هەروەها وتیشی،”شێوازی گواستنەوەی دەرمانەكەش بەشێوازێكی نایاسایی دەگوێزرێتەوە، ئەو دەرمانانە ئەگەر پكشنینی كوالێتی كۆنترۆڵیشییان بۆ كرابێت، نابێت لە پشتی ئۆتۆمبێلی ئاساییدا بگوازرێنەوە بەڵكو پێویستە لە پلەیەكی گەرمی گونجاو و بەشێوازێكی تەندروست بگوێزرێنەوە.”

بابەتی پەیوەندیدار

Back to top button