وێستگە گرنگەکانی ژیانی نەوشیروان مستەفا

لڤین:

نەوشیروان مستەفا، یەکێک لەو سەرکردە و شۆڕشگێڕو ڕۆشنبیر و سیاسەتمەدارە دیارانەی کوردە کە 4 ساڵ بەر لە ئێستا، ماڵئاوایی یەکجاریی کرد، لە ژیانی سیاسی و کۆمەڵایەتیدا، زۆر کاری کردووە کە بەشێک لە وێستگە گرنگەکانی ژیانی لێرەدا دەخەینەڕوو.

نەوشیروان مستەفا لە 22 ی کانوونی یەکەمی 1944 لە گەڕەکی سەرشەقامی شاری سلێمانی لە دایکبووە.

وەك هاوڕێ نزیكەكانی دەگێڕنەوە نەوشیروان مستەفا سەرەتای شەستەكانی سەدەی ڕابردوو دەستی بە كاروچالاكی سیاسی كردووە، یەكەم وێستگەی ژیانی سیاسیشی یەكێتیی قوتابیانی كوردستان بووە.

قوتابخانەی سەرەتایی و ناوەندی و دواناوەندی لە شاری سلێمانی تەواوكردووە، لە ساڵی 1967 كۆلێژی زانستە سیاسییەكانی لە زانكۆی بەغدا تەواو كردووە، لە سەرەتای ساڵانی شەستەكانی سەدەی ڕابردووەوە لە ڕیزەكانی یەكێتی قوتابیانی كوردستان چالاكانە كاری كردووە.

لە ساڵانی 1963 و 1964 بۆتە ئەندامی سكرتاریەتی یەكێتیی قوتابیانی كوردستان، هەر لەو ماوەیەدا بۆتە ئەندام لە پارتی دیموكراتی كوردستان. لە ساڵی 1967 بۆتە ئەندامی لقی سلێمانی پارتی دیموكراتی كوردستان.

گۆڤاری رزگاری كە لە ساڵی 1969 دا دەرچووە، نەوشیروان مستەفا خاوەنی ئیمتیازی ئەو گۆڤارە مانگانەیە بووە.

پاش بەیانی 11ی ئازاری 1970 نەوشیروان مستەفا و کۆمەڵێک هاوڕێی دووردەخرێنەوە لە سلێمانی بۆ خوارووی عێراق و پاشان لە بەغدا یەك دەگرنەوە.

ئیدی لەو سەردەمەدا نەوشیروان مستەفا بەرەو نەمسا بە مەبەستی خوێندن و دووركەوتنەوە لە هەڕەشەكانی ئەو سەردەمەی حكومەتی عێراقی بە ڕێدەكەوێت كە لەو سەردەمەدا لەلایەن حكومەتی عێراقییەوە سزای لە سێدارەدانی بۆ دەرچووە.

لە نەمسا پاش تەواوكردنی ماستەر، سەرقاڵی خوێندنی دكتۆرا دەبێت لە بواری یاسای نێودەوڵەتیی، بەڵام بۆ دامەزراندی یەكێتیی نیشتمانیی کوردستان واز لە خوێندنەكەی دەهێنێت و دەگەڕێتەوە كوردستان.

لێرە بەدواوە ئیدی نەوشیروان مستەفا وەك سەركردەیەكی دیار بە تەواوی دەردەكەوێت كە هەم سكرتێری كۆمەڵە و هەم جێگری سكرتێری گشتیی یەكێتیی نیشتمانیی كوردستان تا پێش ئەوەی بزووتنەوەی گۆڕان دابمەزرێنێت، لەو پۆستەدا بوو.

دوای جیابوونەوەی لە یەکێتی نیشتیمانی کوردستان لە ساڵی 2009دا کۆمپانیایی وشە و دواتریش بزووتنەوەی گۆڕان دادەمەزرێنێت و دەبێتە رێکخەری گشتی بزووتنەوەکە.

نەوشیروان مستەفا لە ساڵی 1981 لەگەڵ کچێکدا بەناوی شوعلە عەلی خێزانی پێكەوە ناوە، کە تەنیا سێ مانگ پێش کۆچیی دوایی خۆی هاوسەرەکەی لە 17ی ئازاری 2017دا کۆچی دوایی دەکات.

نەوشیروان خاوەنی دوو كوڕ و كچێكە بەناوەكانی (نما، چیا، چرا).

كتێبە چاپكراوەكانی نەوشیروان مستەفا ئەمین:

– لە كەناری دانوبەوە بۆ خڕەی ناوزەنگ، دوخی سیاسی لە كوردستانی عێراق لە سالی١٩٧٥ تاكو ١٩٧٩، (كوردستان ـ زەرگەتە: ١٩٩٧).

– پەنجەكان یەكتری دەشكێنن، دۆخی سیاسی لە كوردستانی عێراق لە سالی ١٩٧٩ تاكو ١٩٨٣، (كوردستان ـ زەرگەتە: ١٩٩٧).

– خولانەوە لە بازنە دا، دوخی سیاسی لە كوردستانی عێراق لە سالی ١٩٨٤ تاكو ١٩٨٨، (كوردستان: ١٩٩٩).

– كورد و عەجەم، (كوردستان ـ زەرگەتە: ١٩٩٢).

– حكومەتی كوردستان: كورد لە گەمەی سوڤیەت دا، (كوردستان: ١٩٩٣).

– میرایەتی بابان لە نێوان بەرداشی ڕوم و عەجەم دا، (كوردستان: ١٩٩٨).

– كوردستانی عێراق: سەردەمی قەلەم و موراجەعات، ١٩٢٨-١٩٣٢(كوردستان ـ زەرگەتە: ٢٠٠٠).

– ژیان، بەتەمەنترین روژنامەی كوردی ١٩٢٦ -١٩٣٨ (كوردستان ـ زەرگەتە ٢٠٠٢).

– ژیان، چەند لاپەرەیەك لە مێژووی روژنامەوانیی كوردی ١٩٣٨ -١٩٥٨ (كوردستان ـ زەرگەتە: ٢٠٠٦).

– كارەساتی هەكاری، (كوردستان ـ زەرگەتە: ١٩٨١).

– كێشەی پارتی و یەكێتی، (كوردستان ـ زەرگەتە: ١٩٩٥).

– ئێمە و ئەوان، (كوردستان ـ زەرگەتە: ٢٠٠٩).

– بەدەم ڕێگاوە گوڵچنین، (چوار بەرگ).

– ئەدەب و تاریخی كوردی، (كوردستان ـ زەرگەتە: ٢٠١٢).

چوار ساڵ بەر لە ئێستا ولە 19 ی ئایاری 2017 نەوشیروان مستەفا ڕێکخەری بزوتنەوەی گۆڕان و شۆڕشگێڕو ڕۆشنبیر و سیاسەتمەداری کورد لە گردی زەرگەتەی شاری سلێمانی کۆچی دواییکرد.

 

بابەتی پەیوەندیدار

Back to top button