قەدەغەی هاتووچۆ لە عێراق هەڵگيرا

لڤین:

لیژنەی باڵای تەندروستی و سەلامەتی عێراق، ئێوارەی ئەمڕۆ پێنجشەممە، کۆبوونەوەیەکی ئەنجامدا و ڕاگەیەندراوێکی بڵاوکردەوە و ڕایگەیاند،”بڕیاردراوە بە راگرتنی قەدەغەی هاتوچۆی تەواوەتی لە بەغداو سەرجەم پارێزگاكانی دیكەی عێراق لە رۆژانی جەژن و دواترداو پەیڕەوكردنی قەدەغەی هاتوچۆی سنوردار لە سەعات ( ٩ )ی ئێوارەوە بۆ ( ٥ )ی سەرلەبەیانی لە سەرجەم رۆژانی هەفتەدا”.

لە بەشێکی تری ڕاگەیەندراوەکەد اهاتووە،” مۆڵ، چێشتخانە، كافتریا، سینەما، هۆڵی بۆنەو ئاهەنگەكان، مەلەوانگەو شوێنی مەساج، تەنها لەماوەی پشوی جەژندا بەداخراوی دەمێننەوەو لە رۆژی ( ١٧ )ی ئەم مانگە رێگەی بە كردنەوەیان لە سەعات ( ٥ )ی بەیانییەوە بۆ ( ٨:٣٠ ) خولەكی ئێوارە دەدرێت جگە لە هۆڵە بۆنەكان و سینەما و مەلەوانگەو شوێنەكانی مەساج نەبێت كە بەداخراوی دەمێننەوە”.

هەروەها”بڕیاردراوە بە قەدەغەكردنی نێرگەلە لە چێشتخانەو قاوەخانەو كافتریاكان و شوێنەكانی دیكە، ئەوەشی سەرپێچی بكات شوێنەكەی بۆ ماوەی 90 رۆژ دادەخرێت”.

یەكێك لە بڕیارەكانی دیكە ئەوەیە كە،” ئەو كەسانەی لەكاتی بەكارهێنانی ئامڕازەكانی گواستنەوەدا دەمامك نەبەستن غەرامە دەكرێن و هەروەها گەشتی بەكۆمەڵی نێوان پارێزگاكان قەدەغە دەكرێت”.

سەبارەت بە دەوامی فەرمانگەکانیش بڕیار دراوە کە،”دەوامی رەسمی لە سەرجەم فەرمانگەكان جگە لە دامەزراوە تەندروستی و ئەمنی و خزمەتگوزارییەكان لە ( ١٧ )ی مانگەوە بۆ ( ٢٠ )ی مانگ رادەگیرێت”.