دژی سزادانی چالاکوانانی بادینان لە ڕانیە گردبوونەوە بەڕێوەچوو
لڤین:
ژمارەیەک لە چالاکوانانی سنووری ئیدارەی ڕاپەڕین، لەناو باخی گشتی ڕانیە، گردبوونەوەیەکی ناڕەزایەتیان لە دژی سزادانی دەستگیرکراوانی بادینان ڕێکخست.
چالاکوانانی سنووری ئیدارەی ڕاپەڕین، لە گردبوونەوەکەدا ئاماژەیان بۆ ئەوەکرد کە “ناکرێت چالاکوانان و ئازادیخوازانی لە زیندان بن ئێمەش لە جەژن و خۆشیدا بین و مرۆڤە جوامێرەکانی هاوپیشەمان بە تەنها نین”.
ڕاشیانگەیاند کە دەستگیرکراوانی بادینان بۆ ئازادی و ماف و قووتی خەڵک و دژی داگیرکاریی بوێرانە ڕای خۆیان بە ئاشکرا دەربڕیووە، ئەگەر وەڵامی داخوازییەکانی دەستگیرکراوان نەدرێتەوە ڕۆژێک دێت ئەم دەسەڵاتە کۆتایی پێبێت.
بەشداربووانی گردبوونەوەکە داواشیانکرد سزادانی پێنج ڕۆژنامەنووس و چالاکوانەکەی بادینان بە شەش ساڵ لەلایەن دادگاکانی هەولێرەوە، هەڵبوەشێنرێتەوە و هەرچی زووە ئازاد بکرێن.
