لەسەر كەیسی سزادراوانی بادینان پرسیار لەسەر دامەزراوەی دادوەری پەیدابوە

لڤین:

لە پەیامێکدا کە بە بۆنەی چەژنی ڕەمەزانی پیرۆزەوە، بڵاوی کردەوە، صلاح الدين محمد بهاءالدين ئەمینداری گشتی یەكگرتووی ئیسلامی كوردستان، ڕایگەیاندووە،” هاتنەوەی جەژنی پیرۆزی ڕەمەزان لە موسڵمانانی جیهان بەگشتی و گەلی ئیمانداری كوردستان بەتایبەت پیرۆز ئەكەم”.

لە بەشێکی تری پەیامەکەدا هاتووە،” وێرای بوونی چەند خاڵێكی دڵخۆشی وەكو:
• مزگەوتەكان ئاوەدانن و چین و توێژەكانی كۆمەڵگە بەجوانی و شەوقەوە پێشوازیان لەمانگی پیرۆزی ڕەمەزان كرد.
• دەیان دەزگای خێرخوازی لەچالاكیدایە بۆ بەدەمەوەچونی هەژاران و بێ باوكان و لێقەوماوان كە دیاردەیەكی هێجگار دڵخۆشكەرەوشایانی سوپاس و پێ زانینن..
• بە سوپاسەوە بۆ كەرتی تەندروستی و دەزگا پەیوەندیدارەكان ڤایرۆسی كۆرۆنا لە هەرێمدا لە ژێر كۆنترۆڵدایەو پرۆسەی چارەسەرو ڤاكسین بەردەوامە..

ئەمینداری یەکگرتووە، لە بەشێکی تری پەیامەکەیدا ئاماژەی بەوە داوە کە،” جێگەی داخ و ئەسەفە لەم ماوەیەدا و لەم بۆنە پیرۆزانەشدا چەندین حاڵەتی نەخوازراو دەبینین وەكو:
1/ كێشەی دارایی هاوڵاتیان و سەختی بژێوی و بڕینی مووچەو بێ كاری و ناسەقامگیری ئابوری هەر بەردەوامە..
2/ لەسەر كەیسی سزادراوانی بادینان پرسیار لەسەر دامەزراوەی دادوەری پەیدابوەو ئازادی بیروڕاو فرەیی و ڕۆژنامەوانی كەوتووەتە ژێر پرسیارەوە..
3/ سەرهەڵدانی هەندێ حاڵەتی دزێوی سوكایەتی بەئاین و نەریت و ئادابی گشتی كۆمەڵگە بوونی هەیە..
4/ مەترسی هەڕەشەی ئەمنی و سەرهەڵدانەوەی داعش و شەڕی خوێناوی سنورەكان و ئاوارەبونی گوندەكان لە ئارادایە..
5/ كێشەی داگیركاری قودسی پیرۆز لەدۆخێكی هەڵكشاودایەو لەم مانگە پیرۆزەدا أقصای پیرۆز بەر هێرشی سوپای داگیركەری ئیسرائیل كەوتووە..

هەروەها هاتووە،” خوێندنەوەی دۆخەكە لەهەردوو ڕەهەندەكەوە ئەوە ئەسەلمێنێ كە خولی روحی و عیبادەتی ڕەمەزان توانیویەتی كەشێكی ئارام لەسەر دڵەكان و لەمەیدانی كۆمەڵایەتی و هاوكاری ناوخۆیی كۆمەڵگەدا بەرپا بكات، بەڵام دەخوازێ حكومەت و حكومڕانانی وڵات بەرپرسانەتر كار بۆ چارەسەری كێشەو ئاریشە سیاسی و ئیداری و داراییەكان بكەن”.

لە کۆتایی پەیامەکەدا هاتووە،” بۆیە دەخوازین هەمولایەكمان لەئاستی بەرەكەت و جوانیەكانی ڕەمەزان و جەژنەكەیدابین و پێكەوە دەستباری یەكتربین بۆ خزمەتی گەلەكەمان و چارەسەری كێشەكان و ڕێگرتن لە هەڕەشەی مەترسیەكان”..