بەهۆی پابەندنەبون بەمەرج و رێنماییەکان قائیمقامیەتی سلێمانی چەند شوێنێک دادەخات

لڤین:

راگه‌یاندنی قائیمقامیه‌تی سلێمانی ڕایگەیاند، بەهۆی پابەندنەبون بەمەرج و رێنماییەکان قائیمقامیەتی سلێمانی چەند شوێنێک دادەخات.

ئەمڕۆ شەممە ( ٨ / ٥ / ٢٠٢١ )لەدرێژەی هەڵمەتەكانی لیژنە هاوبەشەکانی قائیمقامیەت بۆ دوکان و بازاڕ و شوێنەگشتییەکان و پشکنین بۆ ئەو کاڵاوشمەک و خواردەمەنیانەی رۆژانە له‌لایه‌ن بازرگانه‌كانه‌وه‌ بەهاوڵاتیان دەفرۆشرێت، سەردانی چێشتخانە، نانه‌واخانه و شیرینییه‌كان دوکانەکانی دیکەی بازاری گەڕەکەکانی چوارچرا و کەنەسورەی شاری سلێمانی_یان کرد.
له‌ هه‌ڵمه‌ته‌كه‌دا ده‌ست به‌سه‌ر بڕێك خواردن و خواردنه‌وه‌ی خراپ و ماوه‌به‌سه‌رچودا گیراو و پسوڵه‌ی سه‌رپێچی بۆ خاوه‌ن شوێنه‌كان كراوه، هەروەها بەهۆی پابەندنەبون بە مەرجەکانی تەندروستی و ڤێتێرنەری و رێنماییەکانی دیکەی کارکردن و دانانی خواردن و خواردنەوە لە شوێنی گەرم و بەرتیشکی خۆر چەند شوێنێک داخران.
به‌پێی رێنماییه‌كانی تەندروستی، نابێت خواردن و خواردنەوە له‌ شوێنی گه‌رم و به‌رتیشكی خۆر عه‌مبار بكرێت یان بگوازرێته‌وه‌، چونكه‌ به‌هۆی كارلێكی كیمیاییه‌وه پێکهاتەکانیان دەگۆڕێت و ده‌بێته‌ هۆكاره‌ كه‌مبونه‌وه‌ی به‌رگری له‌ش و زیان به‌ته‌ندروستی مرۆڤ ده‌گه‌یه‌نێت، ‌ هەروەها توشبون به‌نه‌خۆشی شێرپه‌نجه‌.
هەڵمەتی لیژنە هاوبەشەکان بە هاوکاری بەڕێوەبەرایەتییەکانی ئاسایش، پۆلیس و تەواوی هێزە ئەمنییەکانی دیکەی شاری سلێمانی بەردەوام دەبێت و هەرشوێنێک سەرپێچی ئەنجام بدات روبەڕوی رێکارە یاساییەکان دەکرێتەوە.

هەروەها بەهۆی پابەند نەبون بەمەرجەکانی کارکردن و سەرپێچیکردن کردن لە رێنماییەکانی تەندروستی، قائیمقامیەتی سلێمانی فڕنی سەمونی دڵی چوارچرا لە گەڕەکی چوارچرای شاری سلێمانی دادەخات.