بارزانی و شاندێکی باڵای ئەمریکا کۆبوونەوە

لڤین:

لە ڕاگەیەندراوێکدا کە بارەگای بارزانی، ئەمڕۆ( چوارشەممە ٥ـی ئایاری ٢٠٢١ ) بڵاوی کردووەتەوە، ڕایگەیاندووە”مەسعود بارزانی پێشوازی لە شاندێكی هاوبەشی كۆشكی سپی و وەزارەتی دەرەوە و وەزارەتی بەرگریی ئەمەریكا كە پێكهاتووە لە برێت مەگێرك یاریدەدەری تایبەتی سەرۆكی ئەمەریكا و ڕێكخەری كاروباری ئەمنیی ڕۆژهەڵاتی ناوەڕاست و باكووری ئەفریقا لە كۆشكی سپی و دێریك شۆلێ گەورە ڕاوێژكاری وەزیری دەرەوەی ئەمەریكا و دانا سترۆل جێگری یاریدەدەری وەزیری بەرگریی بۆ كاروباری ڕۆژهەڵاتی ناوەڕاست و چەند ڕاوێژكاری تری ئیدارەی ئەمەریكی کردووە”.

لە ڕاگەیەندراوەکەدا هاتووە”شاندە باڵاكەی ئەمریكا جەختی لەوە كردەوە كە ئیدارەی تازەی ئەمەریكا زۆر بە باشی ئاگاداری ڕەوش و گرفتەكانی عێراق و ناوچەكەیە”.

ئاماژە بەوەیش دراوە کە” بیروڕا لەبارەی بارودۆخی سیاسیی ناوچەكە و پڕۆسەی سیاسیی عێراق و هەڵبژاردنەكانی داهاتووی عێراق، و تەحەددیاتی بەردەم پڕۆسەی سیاسیی عێراق و پەیوەندییەكانی هەرێم و بەغدا و، سەقامگیریی عێراق و ناوچەكە تاوتوێ كراوون”.

لە کۆتایدا هاتووە”داعش و هەڕەشەی تیرۆر تەوەرێكی تری ئەو دیدارە بوو و پەیوەست بە هەڕەشەی تیرۆریستانی داعش، سەرۆك بارزانی ئەوەی بە شاندی میوان ڕاگەیاند كە هەڕەشەی تیرۆر و داعش لە عێراق و ناوچەكەدا هەر ماوە، چونكە ئەو هۆكارانەی كە بوونەتە هۆی دەركەوتن و بەهێزبوونی داعش هێشتا چارەسەر نەكراون”.